Jebel halkara howa menzili, Türkmenistandaky Balkanabat, Jebel we Balkan sebitine hyzmat edýän howa menzili. Bu ýurtdaky alty halkara howa menziliniň biridir. Howa menziliniň kuwwaty sagatda 100 adam bolar. Açylansoň, bar bolan Balkanabat howa menzilini şäheriň esasy howa menzili hökmünde çalşar. Gurluşygyň 2025-nji ýyla çenli tamamlanmagyna garaşylýar.

275 gektar meýdany tutýan täze howa menzili, ýokary halkara talaplaryna doly laýyk gelýän häzirki zaman ulag merkezidir. Sagatda 100 ýolagça hyzmat etmek üçin niýetlenen howa menziliniň ýolagçy terminaly 3 gatdan ybarat bolup, tutýan meýdany 5 müň 203 inedördül metre deňdir. Terminalyň içinde ähli zerur şertler döredilen: ýolagçylar üçin garaşylýan zallar, petek satylýan kassalar, lukmançylyk, gümrük we migrasiýa hasaba alyş otaglary, internet kafe, sowgatlyk dükan, garbanyşhana bar. Binanyň ähli ýerleri ýokary tehnologiýaly häzirki zaman enjamlary bilen üpjün edilendir. Howa menzilinde VIP-terminal hem hereket edýär.

Täze howa menziliniň esasy aýratynlygy onuň kuwwatly uçuş infrastrukturasydyr. Bu ýerde her biri 3200 metr uzynlyga we ini 60 metr bolan iki sany emeli uçuş-gonuş zolagy şeýle hem öwrüm ýoly göz öňünde tutulypdyr. Bu bolsa howa menziline bir wagtyň özünde dürli ölçegdäki we ýük göteriji uçarlary, şol sanda Boeing 777-300, Boeing 777-800 we AEROBUS kompaniýasynyň uçarlary ýaly giň göwrümli howa gämilerini kabul etmäge mümkinçilik berýär. 97 200 inedördül metr bolan uçar duralga meýdançasy bir wagtyň özünde 6 sany howa gämisini, 4 sany dikuçary goýmak üçin niýetlenendir.Howadaky uçarlaryň hereketlerine gözegçilik, beýikligi 49,65 metr bolan häzirki zaman dolandyryş diňinden amala aşyrylýar.

Balkan welaýatynyň dolandyryş merkezi bolan Balkanabat şäherinden 20 kilometr demirgazyk-günbatarda ýerleşýän täze desga «Türkmenhowaýollary» agentliginiň buýurmasy esasynda «Gündogdy» hususy kärhanasy tarapyndan guruldy. Bu toplum «Mollagara» şypahanasyndan bary-ýogy 4 kilometr uzaklykda ýerleşip, şypahanada saglyk bejergisini alýan adamlar üçin ulag elýeterliligini ep-esli ýokarlandyrar.